Imam Nisai Rahimahu Allah ki wafat ka Qissah Tahrir: Muhaddisulasr, Hafiz Zubair Ali zai

Imam Nisai Rahimahu Allah ki wafat ka Qissah

 Tahrir: Muhaddisulasr, Hafiz Zubair Ali zai. (Rahimahu Allah)

Imam Nisai yani Abo Abdulrahman Ahammad bin shoaib bin Ali bin Sinan bin bahru nisai rahimah Allah (M.303 h) ka Shumar Hadis ke mashahur Imamon min hota hey or in ki kitab: "Sunan Nisai" Kutab-e- sitah min shamil hey.

Imam nisai ke bare min awam w khwas min yeh Qesah mashhur hey keh unhen Sham ke naasbiyon ney bohat mara tha or woh isi mar ki wajah se shaheed hogaye thy.

Is Qise ki riwayat ka mukhtasr or Jamei jaizah darj zeel hey:

1- Haakam nishapori ney farmaya: pas majh se Muhammad bin Ishaq (bin Muhammad bin yahya bin mandah) Al-asbehani ney biyan kiya:Maen ney Misar min apane Ustadon ko yeh biyan karte huvay suna keh:

Abo Abdulrahman (Nisai) ney aakhari Omar min misar ko Alvida kaha or Dimashq ki taraf chale gaye to wahan in se Moavia bin abi sufiyan (razi Allah anhu) ke bare min pochha giya or in ke fazail ki riwayat ke bare min pochha giya to unhon ney kaha: 

Kya Moavia is par raazi nihen keh in ka mamlah barabr- barabr ho jaye? Chehy jaye keh inhen fazilt di jaye?!

Kaha: Log inhen seeny (yaa khusiyon) par marte rahe Hatta keh woh masjid se nikaal diye gaye, phir unhen utha kar makah le jayia giya or woh wahin 303 H min fout huvay or makah min dafn huvay.

(Marifatu Alomi lhadis, Lilhakam, Safha, 83 H. No 182. Wa Anhu ibnu nuqatata fi altaqyeed: 1/154) 

Is rawayat ki sand min "Mashaikhuna" sare mushikh majhol hen, lehza yeh sand zayif hay or is par Hafiz iban asakar ka Hashiya (Tehzeeb alkamal 1/45) be faidah hey. Is rewayat ko Hafiz zhabi ney baghair kisi sanad ke iban mandah Aan hamzah al-aqbi al-misri waghairah se naqal kiya hay.

 (Seyar Aalaam ulnubala,14/132)

Yehi riwayat be sanad hone ki wajah se mardud hey. 

2- Kaha jata hey keh haakam ney Imam Abualhasan Ali bin Umar Aldarqutni rahmah Allah se naqal kiya: 

"Abo abdalrahman Nisai apane dur ke Asaatizah misar min sab se barhe faqihe, Sahi or zayif rewayat ko sab se ziyadah janne wale or Asmaulrejaal ke sab se barhe mahir they". 

Phir jab woh is maqam par pohche to logon ney in se hasad kiya, phir woh "Ramllah" tashareef le gaye to in se moavia (razi Allah anhu) ke fazail ke bare min pochha gayia to woh chup rahe phir logon ney inhen jamia masjid min mara to aap ney farmaya:

Mujhe makah le jao. Phir woh aap ko makah le gaye or aap bemar thy or makah min shahadat naseeb hoi. (Tehzhibulkamal, Le mizzi,1/45. Wkhtasrahu alzhabi fi seyar aalam alnubala. 14/133)

Agar yeh riwayat haakam yaa Imam darqutni se baa sanad sahi saabit ho jaye to arz hey keh imam Darqutni 306 hijri yaa 305 hijri min peda huvay they, or imam nesai 303 hjri min fout ho gaye they. Lihaza yeh riwayat munqata wa mardud hey.

Yeh woh riwayat hen jinhen ba'az Ulama or waezeen maza le-le kar biyan karte hen.

Maslan shah Abd alaziz dahlvi ney imam nisai ke bare min likha hey: 

"In ki mout ka waqia yeh hey keh jab aap manaqib murtizvi (Kitab ulkhasais) ki tasnif se farg huvay to unhon ney chaha keh is kitab ko Dimashq ki jamia masjid min parh kar sunain taakeh bani Umiya ki saltanat ke asar se awam min naasbiyat ki taraf jo rujhan peda ho gaya tha is ki isilah ho jaye". 

Abhi is ka thora sa hissa hi parhane paye thy keh ek Aadmi ney pocha:

Ameerulmomanin moavia razi Allah anhu ke manaqb ke mutaliq bhi aap ney kuch likha hey?

To Imam nisai ney jawab diya keh moavia razi Allah anhu ke liye yahi kafi hey keh barabr-barabr chhot jain, un ke manaqib kahan hen?.

Ba'az log kehate hen keh yeh kalmah bhi kaha tha keh mujhe un ke manaqib min swaye is hadis "Laa ashaba Allahu batnahu" ke or koi sahi hadis nihen mili.

Phir kiya tha, log un par tot parye or shia-shia keh kar marna pitana shuro kiya. In ke khuseyatin min chand shadeed zarben esi pohnchin keh nieem jaan ho gaye.

Khadam unhen utha kar ghar le aaye. Phir farmaya keh mujhe abhi makah muzmah pohcha do taakeh mera intaqal makah yaa is ke raaste min ho.

Kehate hen keh aap ki wafat makah mozmah pohchane par hoi or wahin safa w marwah ke darmiyan dafn kiye gaye.

 Ba'az ka qaol yeh bhi hey keh makkah jate huvay raastah min ramllah (Filsateen) min antaqal hawa.

Phir wahan se aap ki naash makah moazmah pohchai gayi. Wa Allahu aalm.

(Bustan almuhaddiseen s 267.268)

Yeh sara biyan zieb dastan hay or basand sahi har gizz saabit nihen. Agar koi shakhs yeh kahe keh imam nisai ki wafat kahan hoi thi?

To is ka jawab yeh hey keh imam nisai ke shagird iban Youns almisri (moarikh) ney lalikha hey:

Aap zulqadah 302 hjri ko misar se rawana huvay or 13/Safr 303 h baroz somwar fot huvay.

(Seyar aalam ulnubala 14/133, Almustafad men zeel taarekh bughdad 19/49, taarekh Iban younas almisri 2/24 ta 55)

Hafiz zhabi ney is qoul ko  "Asahu" qarar diya hey.(Alnubala 14/ 133)

Sawal yeh hey keh imam nisai ke Shagird or moarikh taarekh misar ney itne aham waqie ka zikar kiyon nihen kiya?!!! (Bshartikeh) Agar esa koi waqia ronuma hawa tha?!!!

Hafiz zhabi ney baghair kisi sanad ke wazir iban hanzabah (Jafar bin alfazel) se naqal kiya hey keh min ney Muhammad bin mosa (bin yaqub bin mamoon) almamoni (alhashmi, wassaqahu alzhabi fi taarekh ilislam) sahib ulnisai se suna:

Abo Abdalrahman alnisai ney  Hazrat Ali razi  Allah anhu ke khasais (manaqib) par jo kitab likhi, maen ney kuch logonn ko is ka inkar karte huvay suna or fazail shekhain par kitab na lakhane ka inkar karte huvay suna to min ney is baat ka un (Nisai) se zikar kiya. Phir unhon ney farmaya:

Maen Dimashq min dakhal huwa, or wahan Ali (razi Allah anhu) ke mukhalfin bohat ziyadah they to min ney kitab ulkhasais likhi, mujhe yeh ummid thi keh Allah talaa inhen is kitab ke zariye se hidayat de ga.

Phir is ke bad unhon ney sahabah ke fazail par kitab likhi to mere samane unhen kaha gaya: 

Aap Moavia razi Allah anhu ke fazail nihen likhte?

Tao unhon ney kaha: Un ke liye min kiya likhon? kiya woh hadis jis min aaya hey: "Allahumma! Laa tashba batnahu". Aye Allah! Is ke paet ko saer na karna? to woh saile khamosh ho giya. (Alnubala 14/ 129)

Yeh qisah bhi be sand hey or agar kahin saabit bhi ho jaye to kisi qisam ki maar kutai ka is qisse min naam w nashan tak nihen.

Agar koi shakhs kahe keh in qison min sahi yaa hasan sand ka hona zarori nihen. Tao arz hey keh yeh Asool ghalat hey or is ke mukhtasr radd ke liye dekhay mera mazmon: Imam Muslim rahimahu Allah ki wafat ka sabab?. (Maqalat: Jilad, 6. Safah 269).

Is Tahqeeq ka khulaasah yeh hey keh imam nisai ke bare min bustan ulmuhaddiseen waghairah ka qisah Asool muhaddiseen ki ro se basand sahi hargiz saabit nihen or na imam nisai ka shia hona kahin saabat hey, balkeh woh Ahile sunnat ke jalil ulqadar imamon min se they. Rhimahu Allah taala.